.

親愛的Efa,  你好嗎？

又有段時間無黎呢度

幾個月後的我， 改變了很多

但改變的也許並非我的性格或我個人

而係呢一段時間做左既一d 決定(或者係一d 被動既決定：逃避), 令到我既生活、我既將來都好唔同

一年前既逼於無奈地轉工，去左一個對我黎講可以算得上人生中最大污點既地方，令我睇呢個世界既態度、連隨我既命運徹底改變

故事係一年前發生。突如其來地知道舊公司要大規模裁員，雖然唔係好願意離開，但因為覺得太唔secure, 死死地氣走左去揾工見工

見工，真係好好笑，令我覺得自己有時真係可以做最佳女演員，基本上見工既我可以裝出無限倍既自信心，再將我心底裡自己都真係最想自己可以做得到既野講出黎，再將心底裡最真誠既正能量、諗法、理想都表現出來

無可否認，呢個當然並唔係真正既我

當然，某程度上都係久經訓練的結果的結果(多年黎見過好多次工)

呢個亦可能係我九鬱一燥之中燥既部份

呢個燥唔係暴燥，而係唔知點解有時會無啦啦over-confident, 對自己充滿力量、充滿自信

當然，呢d 絕對係假像，只係梗硬谷出黎，一完左就會好似汽球漏氣咁，突然間又非常泄氣，大上大落，又係過山車

Sorry,  唔知講左去邊。

Anyway,  就係工就揾左，空頭支票就開左，然後首先就好淆底，超級擔心、焦慮；然後曾經有段時間希望自己振作過來，又再的起心肝諗住做好佢。。。

點知，惡夢就係度開始。吃力不討好從來都係我最怕最怕既事。但最驚既唔係我自己比自己既負面評價，而係你所謂"上司"的人去無理否定、斥責、出言侮辱你。然後包庇真真正正有問題既人，話最有問題0個個係你！

遇到呢d 事，首先係好驚，成日惶惶不可終日，唔知幾時會再次比人打擊、侮辱，斥責

個時初初做呢份工時仲有去見cp,  但因為當時發生既事太多太快，根本我係等唔到見cp,  就要自己求其是但應付左件事就算。然後到去見cp 時，都唔知講得邊件事，好多時都係講下當前問題就算，但中間好多發生左、令自己好唔開心、情緒好唔穩定的事，根本無辦法完整交代。0係缺乏交代前文後理的情況下，我覺得見黎都好無意思，都幫唔到我d 咩，問題又係自己亂咁應付，然後講番出黎又會比cp 話。當時成日見完會比唔見更加唔開心，所以後來就自己cancel 左一次booking 之後都無再去見。

之後繼續番工的一段時間，都係好唔開心，後來好唔想再覺得吃力不討好，就決定咁不如連力都唔好出，就一定唔會有吃力不討好的問題啦。

個段時間，可以講得上係我人生中最"快活"的日子，我將心思全部轉易擺去自己同屋企度。放工即走，去文具鋪買下材料整影結婚相d props., 去上course 前食埋下午茶，又或去買埋餸番去煲湯、煮番、整甜品、整沙律。放親假我都完全唔會o掂公司野，玩曬or hea 曬d 星期六、日。

呢種日子我可以話係爽爆，但其實係工作上我始終係好無滿足感，覺得好唔實在，好討厭間公司的一切人同事。之後我越黎越hea,  hea 到好老實講我自己都知唔係太好。但我開始變得好憤世嫉俗，有乜野出黎做得唔好，我唔再好似以前咁怪自己，我開始覺得問題都係人地身上。我覺得不嬲個世界都唔公平架啦，我做咩要比自己做suffer 個個，唔係人地？我唔會再對任何事上心，令自己受到傷害，尤其是呢個根本就係唔值得既地方。而且，黎緊我一定唔會繼續留係呢度。

後來，因為公司有d 野係要appraise 表現，所以我就落番少少力，當然呢d 力同以前比，都唔算係咩力。但其實一落力，我就覺得好有不討好既感覺。始終，我會覺得呢度唔係適合我既地方，咩都會諗：算吧啦，求其算。。但其實我內心始終係好唔滿足。

呢排忙完appraisal 就突然又有第 d 對公司黎講幾重要的事要負責。本來，呢d 野，明明又唔係自己野，求求其其咪算囉，但我份人又係犯賤，咁橋遇著個partner 其實人幾ok,  我就唔想自己咁衰，咁唔負責任，所以其實都算好盡力去做，無hea 過。。

其實，唔hea 就唔代表會做到令人滿意既。尤其是當呢個地方始終對新人係一向唔fair, 而老細又有d on9 無極限個種(對唔住實在諗唔到第個形用詞) 。anyway,  總之，件事就係落左力，但你都唔知為咩個種。

然後，雖然自己預左話唔做，但最後就由老細開口話唔同我逐約先，心裡始終不是味兒，心理硬係覺得好唔平衡。好似再一次比人否定咁，好灰好頹。

本來就想轉行了，明知自己唔岩撈呢行飯，但可能個人始終怕做轉變，唔知點界又死死地氣走去揾工見工。遇著淡市，無咩interview,  又有d 灰。有interview 時，起初又有d 抓狂，後尾男朋友同我講有無工做都唔緊要，當我有呢種心態時，我先可以再次放鬆。

同一時間發現舊公司都請人，經歷左呢一年既否定同灰(未寫，完待續)